um félagið

Diabetes Ísland

Samtök sykursjúkra voru stofnuð árið 1971 af hópi sjálfboðaliða, árið 2023 var nafni félagsins breytt í Diabetes Ísland – félag fólks með sykursýki

Starfið hefur ávallt byggst á framlagi sjálfboðaliða; fólks með sykursýki, fjölskyldna þeirra og vina og áhugasams heilbrigðisstarfsfólks. Í upphafi árs 2023 voru félagsmenn um 1600 talsins. Auk fólks með sykursýki og aðstandenda þeirra kemur að starfinu fjöldi heilbrigðisstarfsmanna, apóteka, heilbrigðisstofnana og styrktaraðila.

Árlegur aðalfundur er haldinn í mars. Þar er kjörin 5 manna stjórn sem skiptir með sér verkum og fer hún með öll málefni félagsins milli aðalfunda.

Diabetes Ísland – félag fólks með sykursýki eru landssamtök en einnig eru starfandi samtök foreldra sykursjúkra barna, Dropinn, sem er með vefsíðu á slóðinni https://dropinn.is

Félagið hefur einn starfsmann í hlutastarfi og er skrifstofan opin tvo morgna í viku, á þriðjudögum og fimmtudögum kl. 10-12. Skrifstofan er til húsa í Mannréttindahúsinu við Sigtún 42, en þar eru til húsa ÖBÍ réttindasamtök auk fjölda aðildarfélaga þess og mörg önnur félagasamtök sem starfa að svipuðum málefnum.

Meginverkefni félagsins eru:

• Að ljá fólki með sykursýki rödd í almennri umræðu og að tala máli þeirra við yfirvöld.
• Að gefa út fræðsluefni um sykursýki og fylgikvilla hennar, bæði fyrir sjúklingana sjálfa og fyrir allan almenning.
• Að skipuleggja fjölbreytt félagsstarf fyrir félagsmenn sína.
• Halda uppi fræðslu um sykursýki
• Vinna að því að styrkja heilsugæslu, forvarnir og að styðja við starfsemi Innkirtladeildar á Landspítala.

Diabetes Ísland er hluti af IDF, alþjóðlegum samtökum fólks með sykursýki, og félagið er einnig virkt í samstarfi Norðurlandanna, auk þess sem það er hluti af Öryrkjabandalagi Íslands

Með skráningu í Díabetes Ísland styrkir þú starfsemi félagsins, skrifstofu og fræðslustarfsemi.

Almennt félagsgjald er kr.3000 á ári, en kr.1500 fyrir elli- og örorkulífeyrisþega.